ការប្រកួត AFC Asian Cup 2023 Play-Off រវាងក្រុមបាល់ទាត់ជម្រើសជាតិកម្ពុជា និងកោះហ្គាំ នឹងមិនធ្វើឡើងនៅទឹកដីនៃក្រុមសាម៉ីឡើយ តែនឹងលេងនៅទឹកដីកណ្ដាលជំនួសវិញដោយសារតែបញ្ហាការរាតត្បាតនៃជំងឺកូវីដ ១៩ ដែលមិនទាន់ស្រាកស្រាន្ដនៅឡើយ ។
យោងតាមទំព័រហ្វេសប៊ុកផ្លូវការរបស់សហព័ន្ធកីឡាបាល់ទាត់កម្ពុជាបានបង្ហោះនូវព័ត៌មានស្ដីពីការប្រកួតរវាងក្រុមទាំងពីរថា “ដោយសារស្ថានភាពជំងឺកូវីត ១៩ នៅកម្ពុជា និងកោះហ្គាំមានការរីករាលដាលខ្លាំងធ្វើឱ្យការធ្វើដំណើរទៅមកចេញចូលមានការលំបាក ដូច្នេះគណៈកម្មការប្រកួតសហព័ន្ធកីឡាបាល់ទាត់អាស៊ី (AFC) បានសម្រេចរៀបចំការប្រកួតរវាងក្រុមទាំង ២ នៅប្រទេសបារ៉ែន សម្រាប់ការប្រកួតវគ្គជម្រុះ AFC Asian Cup 2023 Play-Off រវាងក្រុមជម្រើសជាតិកម្ពុជា និងក្រុមកោះហ្គាំ ដើម្បីឡើងទៅកាន់វគ្គជម្រុះជុំទី៣” ។ យ៉ាងណាក្ដី សហព័ន្ធកីឡាបាល់ទាត់កម្ពុជា ក៏បានថ្លែងអំណរគុណចំពោះប្រទេសបារ៉ែនដែលស្ម័គ្រចិត្តផ្ដល់ទីតាំងសម្រាប់ការប្រកួតរបស់ក្រុមជម្រើសជាតិកម្ពុជា និងកោះហ្គាំទាំងពីរប្រកួតនៅទីនោះផងដែរ ។
ដោយឡែកសម្រាប់ការប្រកួតនៅប្រទេសបារ៉ែន ការប្រកួតរវាងក្រុមទាំងពីរនឹងធ្វើឡើងពីរជើង ដោយជេីងទីមួយធ្វើឡើងនៅថ្ងៃទី ០៩ ខែតុលា ឆ្នាំ២០២១ ខណៈជើងទីពីរនឹងធ្វើឡើងនៅថ្ងៃទី ១២ ខែតុលា ឆ្នាំ២០២១ ផងដែរ ។
សូមបញ្ជាក់ថា ដំបូងឡើយការប្រកួតរវាងក្រុមទាំងពីរបានកំណត់រៀបចំឡើងនៅតាមទឹកដីសាម៉ី តែដោយសារតែបញ្ហាកូវីដ ១៩ ការសម្រេចចិត្តចុងក្រោយរបស់ AFC ត្រូវធ្វើឡើងនៅទឹកដីកណ្ដាល ដោយជ្រើសរើសប្រទេសបារ៉ែនសម្រាប់ការប្រកួតនេះ ។
រូបភាព៖ សហព័ន្ធកីឡាបាល់ទាត់កម្ពុជា
ដោយ៖ June